~ حاجة مليحة ~ .. ارواحو نحكيلكم على حراير بلادي .. * مميزون *

السلام عليكم و رحمة الله و بركاته
صحيتو ناس اللمة واش حالكم؟ ان شاء الله كامل راكم لاباس
اليوم كي قررت نكتب موضوعي تاع مسابقة مميزون
قلت هذي اول مرة نكتب في هذا القسم
و زيد معانا اختى ليليا منافسة ربي يبارك خبرة و تو تغلي علينا الخبز ههه
هيا نروح نضرب طلة على المواضيع في القسم
و الصدمة نلقا ياسر مواضيع تمنشير في النسا .. و تقولو نسبة العنوسة زادت
حبيتو تخلونا بايرات على حساب القلة القيلة و لا كيفاش ؟؟

~ ارواحو نحكيلكم على حراير بلادي الفحلات ~

الحرة الدزيرية امك لي تعبت عليك و رباتك على الدين و طلعاتك مومن يخاف مولاه
الحرة الدزيرية امك لي شقات و كبراتك و ليت راجل قادر على شقا الدنيا
الفحلة اختك لي كي تدلل عليها طيبيلي صنفيلي و راني شاهي .. تلقاها غير في الكوزينة تتفنن على جالك
لمرا الدزيرية مرتك لي تصونك و تصون عايلتها و تربيلك اولادك
كي تغضب تراضيك و كي تتعب تريحك
و بحنانتها كي تضيق بيك الدنيا تنسيك

حراير بلادي لي وقفو معا المجاهد و حرو هذي لبلاد
حراير بلادي لي صاينين ارواحهم و رافعين راس اهلهم
الفحلة الدزيرية لي تكرم الضيف و تقيم بواحبه حتى بأبسط حوايج و ترفع الراس
الحرة لي تعاون جارتها في افراحها و احزانها
الحرة لي تحفظ اسرار دارها و ما تخرجهاش

حرة بلادي كل صبع بصنعة
حرة بلادي الزين و العين و رضاية الوالدين

و زيدو قولولي دزيريات بايرات :p

كلـــــــــــنـــــــا اخــــــــــوة
في أمان الله
:regards01:

from منتدى اللمة الجزائرية