حاجة مليحة ....{ مُمَيَّزُونْ }.....و يقلك دزاير ما فيهاش الخير...

السلام عليكم و رحمة الله
وش راكم يا ناس اللمة ..؟ ..لابس ؟؟ ...حتى انا راني لاباس ....من جيهة ربي و الحمد لله ...ثاني من جيهة ناس الخير ...
حنا ديما نهدرو على الظواهر المدرحة و ننقدو فيها و كذا و كذا
اليوم ان شاء الله ...نحكو على ظواهر زينة و مليحة في مجتمعنا الجزائري عموما و الجلفاوي خاصة * المحيط النايلي *
نبداو من دزاير عامة
......ويقلك الخير ترفد ..لا...الخير مازال ...و الحمد لله .....
قداه من مرة شفنا مطاعم الرحمة في الطرقات لافطار الصائمين في شهر رمضان ......
قداه من مرة شفنا الناس يجملو الدراهم لكاش واحد مقبل على عملية ....بالتضامن قدرو الرجالا و النسا الاحرار يجملو الملاين في وقت قليل ....
قداه من مرة شفنا ناس تتبرع بما عطاهم ربي في سبيل الله ........
ايا و ضروك ندوروها للمحيط الجلفاوي و النايلي ......
الحمد لله ....و عندنا واحد اللقطة هاهي وين ...يسموها * المعروف *......حتى و ان هذي الظاهرة قلت ...لكن مازال كاين منها شوي ....المعروف هذا يتمثل في اخراج اطباق من اكلات تقليدية كيما المردود لي يسموه البعض في الولايات الاخرى * بركوكس * ....ايا ويخرجوه للجيران والناس لي رايح و جاي و للمحلات المجاورة لصاحب الصدقة او المبادرة و هكذا ....
......
هذا فيما يخص الصدقات اما لو ننظرو لجانب اخر .....جيهتنا و المناطق الجنوبية عموما ....كاين بكثرة المدارس القرانية لي نسموها حنا * العربية * ...يعني جو ما شاء الله ..التلاميذ الله يبارك محافظين على تلاوة كتاب الله و يقراو الحديث و الفقه ...و ماكانش طفل و لا طفلة الا و لازم يقرا في العربية ...يعني هذي عادة جرات في مجتمعنا
.......
ويقلك الخير ماكانش ....يا جماعة لا زم ننظرو ثاني للامور الايجابية .......و الله يوفقنا لك ما هو خير ....

ولي شاتي يعرف المردود البنة تاعو كيفاه ....يجيني للجلفة و نضيفو زين ان شاء الله
ههه
والسلام عليكم و بالعافية

from منتدى اللمة الجزائرية