مميزون الحمد لله على نعمة أنا جزائري...

السلام عليكم ورحمة الله وبركاته

تحت شعار (كلنا إخوة ) برعاية منتدى اللمة الجزائرية
كيما تعرفوا الشعب الجزائري هو شعار يضربوا بيه المثل فالتعاون والإيخاء كي نقول جزائري برك فخامة الإسم تكفي:regards02:
صدقوني ساعات كي نتصفح في الانترنت نلقى جزائريين وجزائريات كيفاه يمدحوا فيهم الإخوة العرب حتى الدمعة تجيني وخاصة عشق الفلسطينيين لينا لوكان ندخل فالتفاصيل مانكملش
الحمد لله شعبنا شعب محبوب لأننا شعب واقف مساند وكيما يقولو فوقت الشدة الصح يبان...
السوجي ديالي هذا يدور على انتشار المنظمات الخيرية بشكل واسع وكبير الله يبااااارك
مثلا فالبرامج التلفزيونية نلقاو ناس يستنجدوا وحالاتهم يرثى لها تلقى الشعب في الدقيقة والحين يستجيب ويجيه النيف على خوه ولا اختو الجزائرية
مايجوزش شهر على ذيك الحصة حتى تلقى هاذاك المريض ولا المحتاج الملايين من كل الولايات جاو ليه ولباو طلباتو والحمد لله
نلقاو تانيك منظمات أخرى يقودها شباب يساعدو المساكين يطمولهم دراهم يكسوهم فالشتاء يفرحوهم فالأعياد وصت وين انهم بناولهم بيوت وزينوها لآخر طراز ماشاء الله
ياسعدهم دخلوا الفرحة على اليتامى والمساكين
ماننساوش تانيك فضل الجمعيات الخيرية على دور العجزة كذلك المرضى بالسرطان والداء السكري
مؤخرا حضرت تظاهرة بزاف عجبتني وهي ضد السيدا رحت مع جمعية يترأسها طلبة جامعيين صدقوني جوزت اجمل لحظات حياتي واجمل حاجة كي شفنا هاذوك المرضى فرحانيين فالحفل ألي نظمناه في مقام الشهيد التقطت بعض الصور نحاول نرفقها معايا
وأخيرا نظم طلبتنا نهار للتبرع بالدم
ووالله مهما حاولنا نعدو ونحصو طيبة الشعب الجزائري مانووفوش ومانلحقوش
احرت في اختيار الموضوع لانو الشعب الجزائري واقف في كل المواقف وأكبر دليل زلزال بومرداس فياضانات باب الواد وغيرها من الكوارث
تلقى رجال ونساء واقفون
شوفو في رمضان مطاعم الرحمة وعابر السبيل والمسافرين التي تنظمها جمعيات خيرية طيلة أيام رمضان
صراحة مازال الخير في أولاد بلادي
:up:
وصراحة موقف صرالي كي كنت مريضة من عينيا نحساب روحي بريت وتقلقت من غيابي المطول على الدراسة فجأة البياض عماني وصحبتي مكانتش معايا خطوة ماقدرت نخطوها
شافني رجل والله صدقوني حبس بسيارتو وقطعني الطريق ووصلني للجامعة وين تلاقيت بصديقتي وهي وجهتني الحمد لله كان جزايري فحل و عرض عليا أنو اذا ماعنديش الي يساعدني يكريلي طاكسي لباب الدار
والله دعيتلوا بالخير وقعدت نقول الحمد لله مازال كاين الرجال:up:
و الحمد لله لأنني جزائرية
وأخيرا أخيرا...
تفضلوا صور الي التقطتها في تظاهرة ضد السيدا كلنا باللون الاحمر والبلونات الحمراء نردد كلنا ضد السيدا ومع مرضانا قلب ورب
والكلام لايكفي لو امكنني لادرجت لكم الفيدية والله التعبير مايكفي




وهنا رسمنا شعار ضد السيدا المعروف


وفالاخير نقول حتى شعار كلنا أخوة راه مجسد فاللمة شحال من مرة نلقى خاوة وخيات هنا متعاونين والحمد لله
ربي يوفقنا ويوفقكم ديما للخير وربي يحفظ ولادنا وبلادنا
تحيتي الغالية ليكم
جزائرية وأفتخر

from منتدى اللمة الجزائرية