مشكلتي نروح نزورها ولا لا؟

السلام عليكم
أنا راجل عمري 29سنة كنت متزوج بامرأة لاباس بيها بنت فاميليا و محترمة عشت معاها 3 سنوات كانت سنين مليحة مابيناتنا كلش كان مبني على الإحترام والمفاهمة والمودة جبنا ولد وكان لينا كل شيء فالحياة لكن المرأة تبدلت عليا ضربة وحدة في فترة ولات ماتستحملنيش و تحكي معايا من فوق قلبها لاحظت برودة فحديثها معايا ولات ماتهتمش بيا إطلاقا حبيت نكتشف وش كاين ؟ تظاهرت بأنو كل شيء عادي وراقبتها من البعد واكتشفت خيانتها ليا حدثتها فالأمر بهدوء تام لأني حاولت نفهم منها وش راهي تدير قبل ما نتخد القرار بالطلاق لأنو أمامنا ولد يعاني إذا طلقتها المرأة زادت الطين بلة و قالت كلام لا يقوله إنسان عاقل وأستحي من قوله أمامكم ومن بين كلامها قالت أنها باردة تماما وماتحس بولا شيء اتجاهي في قلبها وأنها حابة تستمتع بحياتها يعني كلامها كان ككلام فتاة مراهقة ونظن مزال عقلها صغير هي عمرها 26سنة
المهم حدث الطلاق وهذا أكيد وهي دات الولد ولكن وصلني خبر بعد أشهر من طلاقنا أنها مرضت بزاف وراهي كل يوم تدوخ و تطيح أنا منخبيش عليكم راني حزين بزاف كيفاش مانحزنش وهي كانت في يوم من الأيام مرتي وراهي أم ولدي الغالي أدعولها ربي يشفيها وسؤالي فالأخير هو نروح نزورها ولا لا؟
وشكرا على قراءة حديثي يا سادة يا محترمين

from منتدى اللمة الجزائرية